Williams Lake

Üses nächschte Zieu isch Williams Lake. Vo Quesnel här si mir ungefähr 270 Km gfahre, bis mir de ä schöne u einsame Platz am Jacobs Lake ir Nechi vo Big L. Ranch hei gfunge. Zerschte Mau wo mir 'wiud' hei campet :-) Isch mau öpis angers gsi - aber d'Bärespure nid wit wäg vo üsem Camper hei üs de scho chli äs mulmigs Gfüehu gä u de simer de o nid wit ga loufe.

Am Mittwuch, 23. Juli 2014 mache mir üs de ume ufe Wäg id Stadt Williams Lake. Dert hätte mir eigentlech nochli wöue ga Suveniers choufe, aber irgendwie hei mir de ke Lade gfunge wo üs het passt. So gömer witers nach Lac la Hache...