Chilko River Lodge - üse Wäg dert häre

Über 4 Stung u 429 Km simer vo Williams Lake nach Tatla Lake ungerwägs gsi - üses Zieu isch d'Lodge vome Wittwer Hausi (ä Tipp vom Gerber Simu u Franca). Das sig ä Schwizer wo die Lodge füehrt. Das tönt no guet, heimer gseit u mache üs buechstäblech uf d'Suechi nach däm Hausi... Da mir ke richtegi Adrässe vo ihm hei, nume d'Beschribig dasses irgendwo am Chilko River sig. Dä Fluss isch aber läng!! Mir biege de vom Highway ab, dass mir däm Fluss nah chöi fahre - ä schlächti Idee! D'Stass isch nid würklech guet, 2 Brügge, wo chli schitter usgseh überquere mir o. Nei, das chas nid si. 

Hie simer im Indianer-Land u de frage mir 2 euteri Indianer, wo äch die Chilko River Lodge isch. Die Zwöi hei nüm mänge Zang im Muu... Aber dr Wäg heisi üs chönne erkläre!! Zrügg ufe Highway. 

Wo mir de ändlech dr Wägwiser zur Lodge am Strasserand hei gseh, das mir hie i Waud müesse abbiege, heimer dänkt, itz heimers de grad gschafft. Nüt isch. No einisch 1 Stung simer düre Waud u Schotterstrass gfahre. 

Mir hei würkli auso scho fasch nüm dra gloubt, dass mir die Lodge wärde finge. Tatsächlech fahre de mir plötzlech zure Farm oder öpis ähnlechs. Ross uf dr Kopple, ganz viu auti Outo u schüsch Fahrzüg wo desume stöh. Mir fahre de zueche u us dr Wärchstatt rüeft eine "Sälüü zämä" :-D 

Mir si acho, heimer zunang gseit!