19. & 20. Juli 2014

Mir si ufem Wäg nach Prince George. Äs längt üs nid ganz bis zu üsem Zieu. Ca. 1/2 Stung vor Prince George finge mir ä Campground. Mi düechts hie bau chli uheimelig... Rundume dichte Waud - Villech ligts o am chaute rägnerische Wätter, wo däm Campground dr ungmüetlech Idruck verleiht. Dr Abe lö mir miteme UNO la usklinge. 

Am Sunnti Morge geits witer nach Prince George. Chum dert acho, finge mir die Stadt nüt bsungerigs u mir sueche sofort nacheme nöie Zieu... Äs füehrt üs nach Fort St. James. Ungerwägs gseh mir riesegi, flachi Fäuder - dervo tröime mir nume i üsem chline, ghögerige Ämmitau. Sandro u Ben si ganz fasziniert u wete grad mitere Maschine iz Fäud fahre. ;-) 

Mir finge hie ganz ä schöne Platz zum übernachte, ganz ir Nechi isch ä See mit Sandstrand u rusche tuets grad wie am Meer. :-) Zwätter het itz o ufta u mir chöi hinech ume eis am Füür hocke u zerschte Mau Marshmallows ässe... 

I dene 2 Tage simer öpe 591 Km gfahre.