Vo Lac la Hache bis Pemberton

I de letschte Tage (27. - 30. Juli 2014) simer vo Lac la Hache über Clearwater (Wells Gray Prov. Park), Kamloops, Logan Lake, Lillooet nach Pemberton gfahre. 

Leider chanech Km nid gnau säge, aber sicher über 1'000. 

Mir hei ume viu gseh: 

Z' Lac la Hache am Helena Lake, wunderschön am See mit Sunneungergang, heimer ä Nacht verbracht. Leider simer dert am Abe vo de Mugge attagiert worde, so dassmer de i Camper si gflüchtet u haut die schöni Abestimmig dinn hei müesse gniesse. :-/ 

Im Wells Gray Prov. Park heimer uh schöni Wasserfäu gseh! Bim einte heimer sogar hinger düre chönne loufe, si derfür nähr nass gsi! Aber bi dene Temperature (über 30 Grad) isch das ä schöni Abchüehlig gsi! :-)

Witer fahre mir nach Kamloops. Itz simer tatsächlech ir Wüescht, hie wachst nüt, nume chli Strücher u we ä Grasfläck chunnt, sisi dert tou am bewässere. Die trocheni Vegetation ziehtsech bis Lillooet düre. Ersch ab Pemberton wirds ume chli grüener u o chli chüehler. Mir hei öpe 35 Grad gha. 

In Logan Lake gseh mir de no eini vo de gröschte Kupfermiine vor Wäut, d'Highland Valley Copper Mine mitere Grössi vo 340 km2. Mit riise Maschine tüesi dert Kupfer abboue. 

Aber die Miine isch soo gross, dass die Fahrzüg bau verschlüüfe. 

Chilko River Lodge - üse Ufenthaut

Soli, i starte dr 3. Versuech öich dä Bricht z'schribe... Z'Internet wot nid, wie i wot! :-/ 

Auso:

1 Maa, 5 Froue, 5 Hüng, 2 Chatze, 9 Ross u 2 Söi (ihrer Näme: Bacon & Ham = uf dütsch: Späck & Schinke...) läbe hie uf der Lodge. Mir wärde ganz härzlech begrüesst u füehle üs de o grad sehr wou u daheime. Villech ligts o dran, dass auses Bärner si, wo hie läbe. 

Dr Hausi Wittwer, öpe 56gi, isch vor 16 Jahr vo Rubige nach Kanada usgwanderet. Är het de churz drufache die Lodge übernoh - d'Kanadier hei ihm öpe äs Jahr gä. Dr Hausi het bis hüt nid ufgä, o wes mängisch nid eifach isch gsi. 

Hie isch ke Luxus (siehe WC) ;-) für üs passts aber tip top. 

So steue mir üs z'Läbe in Kanada vor: d'Froue gö am Morge i Begleitig vo de Hüng ga jogge, die verjage d'Bäre, wo hie läbe. 

Zwe Hüng, dr Manu u dr Koda wiche de o nüm vo üser Site, villech ligts o a de Chnöche, womerne hei gä. :-)

Dr Manu stammi schiins ungerangerem vome Wouf ab, är tuet de üs o grad uf dr erschte Erkundigstour begleite. 

Hie ungernähme mir viu: mir gö ga wandere, ufe See ga böötle, miteme schneuere Boot dr River (Fluss) uf u wider ab, d'Romina u i mache de no ä Usritt ir Wiudnis vo Kanada. 

Dr Sandro u Ben flicke de no grad hurti dr kabutt Quadtöff. Ändlech chöi die zwe ume mau öpis grüble :-D das fäutne auso scho chli... 

Da üs z'Brot usgange isch, mäude mir üs zum z'Morge a. Mir stuune nid schlächt: äs git Röschti, Spiegueier, Züpfe, Schwizer Bärgchäs, Trochewurscht, Orangejus, Müesli usw. Eifach alles was das Herz begehrt. 

Leider heissts de nach 3 Täg Abschiid näh. Hie heimer ganz ä gueti Zyt mit tolle Lüt verbracht. Schad isches verbi - aber die nächschte Abentüür warte scho uf üs...