Üser letschte Tage mitem Motorhome

Mir gniesse üser letschte Tage mitem Motorhome. So kurve mir nochli ir Nechi vo Vancouver desume: Surrey, Abbotsford, Harrison Hot Springs, Kent u Cultus Lake Prov. Park. Hie i däm Park verbringe mir de no üsi letschti Nacht im Camper. Düre Tag (Sunnti) simer de a See u hei sogar chönne ga bade. Das isch ä schöni Abchüehlig gsi. Mir gniesse immer no fasch 30 Grad u Sunne. Verruckt, weme weiss, wis Daheim für Wätter isch gsi oder geng no isch... 

Öpis über 400 Km heimer de ide letschte 3 Tage no gmacht. Nüm viu, im Verglich zum Afang, womer bau a eim Tag so viu si gfahre. 

A üsem letschte Abe heimer doch no äs Lagerfüür wöue mache. Mir hei d'Rächnig aber ohni Parkranger gmacht. Chum hei mir de äs schöns Füürli gha, ischer doch tatsächlech uf sire Kontrollrundi gsi u isch schnuerstracks zu üs cho. Bös het är dri gluegt u het üs gseit, dasmer das Füür sofort müesse lösche. Är isch de o no ga Wasser hole u hets über üses Füür gläärt. :-( Äs het de zum Glück nume ä Verwahrnig gä u ke Buess! Die wär de mit $ 500.00 sehr höch gsi... 

Äs gilt leider in ganz Kanada füürverbot. Aber dert hättemers chönne verantworte, das nid trochen isch gsi. 

Schad. So heimer haut kener Schoggibanane chönne mache. 

31 Tage simer itz mit däm Camper düre Weschte vo Kanada gfahre. 6'357 Km heimer zrügg gleit. :-) 

Äs isch für üs aui ganz ä gueti u spannendi Zyt gsi. Mir hei so viu gseh u nähme ganz mänge Idruck mit hei. 

Gloub das eifache Läbe het üs aune passt. 

Miner Füess si i dere Zyt äuä nie ganz suber worde, da i geng bau nume ha d'Flip Flops anne gha ;-) 

Dr Camper heimer ohni Problem chönne abgä u si de miteme Shuttlebus i üses Hotäu (Sandman Hotel) in Vancouver chauffiert worde.