Üse Bsuech bim Martin & Ruedi Russenberger

Hüt simer in Abbotsford, ca. 1 Std. vo Vancouver, ä "Schwizerbuur" ga bsueche. D'Adrässe het d'Romina im Internet usegfunge.

Sf ungerwägs het im 2010 über Russenberger's ä Sändig gmacht.

D'Adrässe het üs de zu Seniors gfüehrt. 

Beidi si öpe 80gi u no veiechli guet zwäg.

Sie isch ä Chriegsflüchtling vom Dütsche u är isch ä Uswanderer vor Schwiz. Sie heige änang hie in Kanada bime Blinde Date lehre kenne. :-) Mit ihne rede mir de i 3 Sprache: Schwizerdütsch, Hochdütsch u Änglisch. Si fö de ufzmau ume a Änglisch rede oder äs chunntne nume dr Änglisch Usdruck i Sinn. Ihre Sohn redt de numeno Änglisch. 

Sit über 60 Jahr läbe die zwöi itz in Kanada. Dr Martin flügt scho gli id Schwiz, är heig ä Klassezämäkunft. :-) 

D'Farm heisi vo Grund uf säuber ufboue. Hüt füehrt dä Miuchbetrieb dr Ruedi, ihre Sohn. I schetze ihn öpe 50gi.

 Är macht de o d'Füehrig düre Bertieb. 

Über 150 Chüeh heis u no öpis Jungufzucht. Im Mäuchstang chaner 20 Chüeh ufzmau mäuche u sig de i 2 Stung fertig. Au Tag gits öpe 4'000 Liter Miuch woner ine 20'000 Liter Tank tuet. D'Miuch wird de au 2 Tag abghout u wird aus Früschmiuch verchouft.

I de letschte Tage heigesi über 2'000 Höibäueli gmacht... Mir stuune nume so! Z'Land isch topfäben. Dr Senior het üs gseit, dass si ungfähr 50 Ha Land heige (üs hets bau chli weni tüecht, für die Verhäutniss, drum simeris nid ganz sicher, obs stimmt) 

Äs isch aus sehr suber u z'Wohnhuus gseht fasch us wine Villa. D'Grossching vom Ruedi hei ä grosse Spiuplatz mit Rittiplami, Rutschbahn u Chlätterwand.

Vor 8 Jahr heisi die Schüür mit der Mäuchalag boue. Si hei zersch ä Mäuchroboter wöue choufe, aber da dennzumau wenni Servicetechniker si ume gsi, heisi de dä Mäuchstang igrichtet. 

Dr Ruedi seitmer de no, dass si Sohn, wo ihm ufem Betrieb hiuft u de speter wot übernäh, meh a de Maschine intressiert sig u nid gnau wüss, ob är de mit de Miuchchüeh wöu zuefahre. 

Dr Martin u dr Ruedi säge üs de no, wos schön wär zum campe. Mitere Fläsche Wy ure Toblerone (wosi schiins immer überchöme) säge mir de Danke u säge Tschüss.

Mir fahre de dert no chli überland u troue üsne Ouge fasch nid, womer de gseh, dass die das schöne Land bruche für Rollrase zmache... Sündeschad!