Mir säge tschüss u danke viu mau

Soli, üse letscht Tag hie in Kanada geit am Ändi zue. Mir hei hüt no mau Räge gha, aber dä het üs nid dervo abghaute, nochli dür d'Stadt Vancouver zloufe. 

Per Zuefau u wägem Hunger simer uf das Restaurant i 167 m Höchi gstosse. Ä Glaslift wo usse am Geböide ueche fahrt, bringt üs de zu däm Restaurant - ähnlech  wie z' Schilthorn, äs dräit während däm mir ässe u mir gseh über die ganzi Stadt! Auso mir isches scho bau chli komisch worde, so höch obe... 

Aber d'Ussicht isch atemberoubend gsi! 

Morn (Donnschti) am Morge am 9.00 Uhr flügt üse Flüger vo Vancouver ab nach Toronto, dert tüe mir zwüschelande u umstige. Vo Toronto flüge mit de nonstop nach Züri-Chlote u söte am Friti Morge am 7.50 Uhr dert lande. 

Totali Flugzyt si guet 12 Stung u knapp 10'000 Km.

Mir hei hie in Kanada ganz ä gueti Zyt gha u wahnsinnig viu gseh u erläbt. Die viele Idrück u die ganzi Reis wird üs üses Läbe lang i Erinnerig blibe. 

Viellech heimer öich o chli chönne gluschtig mache, für das schöne Land einisch ga z'bsueche. :-) 

Härzleche Dank öich aune wo geng flissig üse Blog hei bsuecht u öpe ä Kommentar hei gschribe. 

Bis hüt isch üse Blog knapp 2'400 Mau agluegt worde. Ungloublech! :-D

Gloub i wirde de z'Schribe no bau vermisse... 

Bis gli! Mir fröie üs ganz, ganz fescht uf öich aui!! 

Ah no öpis, die letschte Föteli si de vo üsem 'Hotäuzimmer' oder besser gseit, Studio... :-)

Stanley Park in Vancouver

A üsem 2. letschte Tag hie in Vancouver bsueche mir no dr Stanley Park. Är isch 404,9 Hektare gross u somit dr gröscht Stadtpark in Kanada. Dr gröscht Teil vo däm Park besteit us Waud, guet ä haubi Million Böim stöh im Stanley Park. 

Mitere Gutsche u Ross gömer de ufene Rundfahrt düre Park. Mir gseh aber nume ä chline Teil vo däm grosse Park. 

Dr Rosegarte bsueche mir de no z'Fuess.